قصيدة حصرية للشاعر علي سليم “روزمان أحمر”

بَعد تاني سيجارة “rothmanes”

دُنيتي اختلفت فى عيني

بُعد تاني ظهر قصادي

يثبت ان المره ديا بُعد برضه بشكل تاني شكلي

راح ادبر حكاية للحكاية الدايره فيا

الكلام جوايا يجرح

بس جرح مفيد وصحي

انك انتِ ايام ماكنتِ كل غلطي وكل صحي

بعد كل الغيبة ديا

راجعه للاشواق تصحي

تخبطي الحاضر برجلك تسكني من تاني روحي

لا يا روحي

لو لابد انك تبوحي فات اوانه

كل واحد خد مكانه والحكاية بقت سخيفة

نمتي فى عيون الجميع

وعند عيني تعملي خضرا الشريفة!

المحاولة حركة حلوة

بس توقيتك ماصابش

خدتي كف عزاء في روحي وكان صوانها ما اتنصبش

كنتِ ابدي من صديقي تنجدي الروح م الليالي

كنتِ ليا ملاذ حقيقي لما بيضيق بيا حالي

كنتِ نَص جديد كتبته واتكتب من بعده اقوي

كنتِ زي مدير في سينما اترفد ومالهوش سطوة

خد حبيبتة جوة شغله ما اتكسفش لما باسها

كنتِ عندي بلاد بناسها

كنتِ صوت “ثومة” وناسها

كنتِ ليا حاجات كتيره

الزمن عدي ودهسها

راجعة تاني؟

حرام يا شيخة الجراح لساها سُخنه

ريحي روحك وروحي واطلعي بقي من نافوخنا

ياما انا وقلب اللي دُخنا

كنا نتمني نلاقيكِ بس دلوقتي انتبهنا

ياما طمناكي واحنا قلقانين من كل حاجة

ياما ضحينا براحتنا لاجل ماتحسي براحتك

اما بعد الورطة منك اقفلي بابك براحتك

بس اظن ان انتِ فاكرة اني ياما كتير نصحتك

الحياة مش علبة المكياچ بتاعتك

وان انا مش هبقي بودرة تحمر الخدين زيادة

واني ماعرفتش اغشك

كل واحد عنده قدرة وانتِ خدتي الزينة عادة

وان انا عرفت الحقيقة

لما مره غسلتي وشك

..

علي سليم، وشهرته «أبو الرتاين» قناوي الأصل والجذور، سكندري المولد والمنشأ. تنقَّل بين محافظات مصر بحكم عمله؛ فهو طباخ وعازف إيقاع. شغل عددًا من المراكز الأدبية المرموقة، وأقام الكثير من الحفلات على اعرق واكبر المسارح، وشارك في أربعة دواوين مجمعة قبل إصدار ديوانه الأول (مختلف عقليًا) في 2017 (أورسليم) ديوانه الثاني2018 (تحرير إسعاف رمسيس) ديوانه الثالث 2019 كما ان ديوانه الرابع (الساقع) كان ضمن القائمة القصيرة لجائزة احمد فؤاد نجم لشعر العامية 2020 اما ديوانه الخامس (ساعة إلا رُبع حقيقة) اخر إصدراته حتي الان.

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى