قصيدة “تواريخ لسه ما اتكتبتش” لشاعر العامية أحمد حمزة

يحرص موقع آخر مترو ليس فقط على معرفة القاريء بأفضل الكتابات والكاتبين، بل يحرص أن على مد القاريء ببعض المعلومات التي قد تساعده في حكمه على الكتاب الذي بيده،  او معلومات عن الكاتب نفسه مثل جزء حصري من كتاب “ميكروفون و جزء حصري من رواية “طيران”  و في هذا المقال سنتناول قصيدة تواريخ لسه ما اتكتبتش لشاعر العامية أحمد حمزة.

قصيدة “وتاريخ لسه ما اتكتبتش”

أمى بتكتب شعر .. أحسن مني

قالت مرة لابويا

( كل مابتطلّ عليا ياحَج

بتلخبط فـ التواريخ )

وإكمنى بغمّس شعر ف طعم نفسها

لما بتطبخ أكلنا بيه

ف فهمت إنها شايفاه بدر منور

وإن الشهر

واقف على يوم ١٤ فيه

وأبويا بيكتب شعر .. أحسن مني

قالها بحنان فرد يمام

بيحابى على واليدة البكر

وأنتي ياحجة

( كل مابتطلّ عيونك

بحمد ربي إنه حباني عيون )

بحمده على عسل الفاكهه الدايب فيكي

بحمده ع الكسوة بتاعة كل نهار

لما القفاطين تبقى إيديكي

والنور الداخل م الشبابيك

يخجل م النور القايد ف عنيكي

غزلت أمى خيوط الود فى شكل ملاية وفرشتهاله

وقالت بحلاوه صوت العصافير

حصالتي الفخار مش بتشخشخ فضة

علشان حوشتك فيها

حوشت هزارك وقعادك

والضحكة اللي بترميها ف حجري

علشان لو خدت الضي ف شنطه سفرك

وخلعت القلب معاك ومشيت

أطلع أجرى عليها اكسرها

وأكشف للدنيا بحالها تحويشة العمر

ويدوم حِسك ف أركان البيت

استحوذ أبويا على دفتر يوميات الوحي

قبل أما يوزع ع الشعراء قصايد منه وقال

ياأمي .. وأم عيالي

والعنبة الطيبة إللى مفرفطة حبات

والست اللي خلقهالي الله بايديه

من ضلع ماهوش أعوج زى بقيت الستات

ياصباح …

ياصباح على طول

وخضار بيغطي الأرض ف فصل خريف 

وياسكة بتربط بين الجنة وبين الريف

ويافرحة بتفتح صدري البايت مقفول

زى مابيكون

فيه جناين شوق طرحه ف شعرك

وأول ماتزيحى الطرحه

بجني المحصول

أمي وأبويا .. لساهم بيخروا حكاوى

خلصوا تلتين الشعر ف حكاويهم

والتلت الفاضل

كان مجازات بينها وبينه

بتقول مفتتح البيت بعينيها

ويتمم ع الشطرة بعينه

وأنا واقف

ما اخدتش نايبي م الوحي الليلة

وورقى العاذب

مشتاق تتغندر سن أقلامى عليه

بس الليلة هتقروا قصيدة جديدة

لميت الشعر المتبحتر منهم

_ على دٰرج السلم

_ وحصير الدار

_ وأسوار البلكونة

_ وملاية سريرهم

وبدرته على الورق الفاضى معايا

وضحكت على العالم كله وقولت

_ إني كتبت قصيدة جديدة _

نبذة عن الشاعر أحمد حمزة

أحمد عبد النبى حمزة

مواليد ١٩٩٤/١/٤

مقيم : دمنهور _ بحيرة

الجوائز التى حصل عليها

١_ جائزة المجلس الأعلى للثقافة

تانى جمهورية ٢٠١٨

٢_ جائزة إبداع لمراكز الشباب الموسم الاول

تانى جمهورية ٢٠١٩

صدر له ديوان( أوركسترا لعازف وحيد) ٢٠٢١.

عمرو العزالي- آخر مترو

عمرو العزالي محرر وكاتب محتوى مصري تنشر مقالاته بشكل حر في منصات عربية إلكترونية وورقية عدة، وينتج المحتوى حالياً لصالح موقع "آخر مترو"، وشاعر وباحث حاز عن كتبه جوائز مصرية وعربية عدة، عمل كمدقق لغوي ومحرر أدبي لدى العديد من المنصات العربية ودور النشر ومنصات الكتب الصوتية، • صدرت له حتى الآن ستة كتب عن جهات نشر مختلفة مصرية وعربية. • حاز عدة جوائز عربية، منها جائزة الشارقة للإبداع العربي فرع الدراسات النقدية عن كتاب "توظيف آليات السيناريو السينمائي في القصيدة العربية الحديثة" 2017، ومنحة الصندوق العربي للثقافة والفنون في لبنان 2018، وجائزة مكتبة الإسكندرية عن كتاب "روافد الخصوصية في مشروع عبد الرحمن الأبنودي الشعري"2019، وجائزة أحمد فؤاد نجم عن مؤسسة نجيب ساويرس (مرتين: مرة في فرع الشعر ومرة في فرع النقد، ويعتبر الأديب المصري الوحيد الذي حصل عليها شعراً ونقداً) عامي 2018، 2020. • شارك في ورش وفعاليات إبداعية ونقدية عدة داخل مصر وخارجها، إضافة إلى تقديمه ورشة عن مبادئ الكتابة الإبداعية في الكويت، بدعوة من المجلس الوطني للثقافة والفنون والآداب في الكويت، والمشاركة في الورش الإبداعية المصاحبة لجائزة الشارقة للإبداع العربي للعامين 2017، و2018.

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى