تعرفي على عالم سارة نشأت: دي نصايحي لأي بلوجر عاوز ينجح.. وده رأيي في جروبات الماميز.. والفولورز أذكياء جداً جداً

تتعدد أوجه حياة الشيف سارة نشأت الإنسانية والعملية، فتستشعر أنها امرأة مصرية حتى النخاع في كثير من المواقف، وكذلك فإن ذوقها غالباً ما يكون غير عربي.. هي أم ومسؤولة وسيدة أعمال ناجحة، لكنها أيضاً تحمل قدراً غير قليل من العفوية التي تتميز بها في التعامل مع متابعيها أيضاً، رغم كونها اليوم واحدة من مشاهير السوشيال ميديا، وبخاصة منصة انستجرام ، لهذا كله جاء حوار آخر مترو الشيف سارة نشأت صادقاً كشخصيتها..

1- أسلوب حضرتك البسيط بيقرب كتير من الناس منك، لكنه أحياناً بيخلي بعض المتابعين يلغوا الحواجز في التعامل.. فخلينا نسأل حضرتك ليه اختارتي الأسلوب ده؟ وبتتعاملي إزاي مع الكومنت اللي ممكن ما يكونش فيه لياقة؟

أسلوبي سهل وبسيط عشان أنا حابة أتعامل مع الناس اللي هما مش مهتمين خالص بالمطبخ ومش بيحبوا يدخلوا المطبخ، بحب إن أنا أبسط لهم المعلومة وأساعدهم إنهم يدخلوا ويحبوا المطبخ..

أما الحواجز اللي ممكن حد يكسرها معايا مش بتحصل كتير الصراحة، والكومنتات اللي ممكن تضايقني مش بحاول قوي إني أركز فيها، لأن مش كل الناس هتبقى موافقة على أسلوب حد ومش كل الناس هتبقى قابلة حاجة حد، فبحاول أتعامل بيها بعدم الرد أو لو رديت ببقى بهدوء وبصراحة عندي جيش بيرد على أي حد بصراحة بيتضايق.

اقرأ أيضاً:

رامز جلال والسوشيال ميديا في شهر رمضان .. والجدال المعتاد حول برنامجه الجديد

 قصة ياسمين يحيى مصطفى مع وكالة ناسا .. لماذا أطلقت الوكالة الدولية اسم الطالبة المصرية على كويكب لها؟

173 ألف ريأكت أغضبني على بوست التهنئة ! تفاصيل ترقية مدرس بكلية العلوم التي أشعلت موقع فيسبوك

2- اختيارات سارة نشأت بتكون أحياناً مصرية إلى حد كبير، أحياناً بتكون صفات من أي مطبخ من مطابخ العالم، حتى في ثقافة الطبخ أو التقديم بتنوعي بين الاتنين.. إزاي سارة نشأت بتشوف علاقة الأكل بهويتنا المصرية (خصوصاً إن حضرتك كنتي من البلوجرز اللي احتفوا بحدث موكب الممياوات الملكية)؟ وإزاي بتشوفي إن ممكن ثقافة مطبخنا المصري ممكن توصل لعدد كبير من الناس من ثقافات مختلفة؟

أنا بحب قوي المطبخ المصري.. بحب قوي الحاجات الأورينتال.. عشان الناس دلوقتي بتنساها، وبيهتموا إنهم يتستخدموا كل المطابخ العالمية وبيحاولوا ينسوا المطابخ المصرية لأن أي واحدة ست متجوزة واحد راجل الراجل دا متعود على طبخ أمه اللي غالباً بينتمي للاختيارات التقليدية الأورينتال بشكل أ بآخر، اللي هي مثلاً كباب حلة وكشك وملوخية والكلام دا وفاصوليا.. صنية البطاطس.. الحاجات دي كلها الناس مش بتعملها قوي في البيوت، بقى الشائع أكتر إنها بتعمل التشيكين ألفريدو وغيرها من الوصفات اللي رايحة للإيطالين أكتر، الإيجيان والحاجات دي.. أما أنا فباحاول أقرب شوية المطبخ المصري للناس أن هو يبقى أسهل لهم وأبسط وفي نفس الوقت طعمه حلو ومختلف عن أي مطبخ تاني.

أما بالنسبة لموكب المومياوات فأنا حبيت أفرَّج الناس اللي ماتفرجوش عليها، لأن أنا شخصيا انبهرت بيها زي كتير من الناس، ونفسي مصر تبقى حلوة كدا دايماً، ودايما نبهر العالم.. موكب غريب زي ده مش هيحصل تاني بسهولة، وإحساسنا إننا عندنا بلات فورم نقدر نؤثر من خلالها ده يخلي لينا دور في إننا ننشر الحاجات الإيجابية والحاجات الحلوة عن بلدنا، يمكن من شوية الفولورز اللي عندي

خمسة أجانب يتفرجوا عليها فينبهروا فيحسوا إنهم حابين ييجو يشوفو مصر، طبعا دا بعد اللي أحنا فيه دا إن شاء الله، فأنا بحب أنشر الحاجات دي بصراحة.

موكب المومياوات الملكية يستعيد أجواء نقل «رمسيس الثاني» | الشرق الأوسط

3- المتابع للشيف سارة نشأت هيفهم إن بنتك بتشغل جزء كبير من وقتك وتفكيرك.. لو متابعين سارة نشأت طلبوا منها وصفة موزونة يظبطوا بيها المعادلة بين ولادهم وشغلهم ونجاحهم هتكون إيه هي أهم بنودها؟

يعني أي أم هتبقى مهتمية بولادها طبيعي فبنتي طبعا بتشغل جزء كبير من وقتي هي وابني بس بحب ان أنا أدخلها في موضوع الطبخ دا علشان تحب أولا المطبخ من صغرها , ثانيا تفهم ليه مامتها عايشة في المطبخ كتير لأن انا شغلي كله في المطبخ، فحابة أن هي تدخل معايا وتشوف ولما الأطفال بيعملوا بنفسهم هما أكل فطارهم والكلام دا بيحبوه أكتر يعني لما بنتي بتقولي عايزة أكثر أنا البيض وأعمله مبخافش من حتة أن هي هتكسر البيض وتوقعه على الأرض أو أو توقع القشر بتاعها جوا والكلام دا لا بخليها تتعلم فبحس أن دي حاجة مهمة  أنهم يكونوا معانا في الموضوع دا..

أما وصفة الموازنة فدي صعبة قوي، يعني أنا ما بعرفش أصلا أظبط حياتي مع اولادي، لو أنا قلت إن أنا أقدر أظبط حياتي مع ولادي والبيت وشغلي الموضوع هيبقى إني باقول لك أي كلام بقى.. هي الأمومة مش سهلة، أمومة مع شغلك مع حياتك مع بيتك مع حاجات كتير جدا مع شغلك..

المعادلة صعبة.. وعشان تعمليها لازم تبقي ذكية، بس في الآخر في حاجات كتير انتي بتيجي على نفسك فيها عشان ناس تانية بس من كتر ما بتيجي على نفسك في كل حاجة دا بيتعبك إنتي في الآخر فلازم الواحد يبقى ذكي، فكل واحد بيعملها بطريقته في الآخر، أنا مش هقدر أقول لك إني مظبطة الدنيا بشكل مثالي لكن بحاول.

سارة نشأت وجوه متعددة.. للحياة

4- طريقة حضرتك للإعلان عن بعض البراندات اللي حضرتك بتتعاملي معاها بتكون عادة كرييتيف مش معتمدة على شهرة سارة نشأت وبس.. هل دي بتكون مجرد أفكار للإعلان ولا بسبب ميولك إنتي للتجديد طول الوقت؟

في الحقيقة لما أي براند يبعت لي حاجة بحب إن أنا أولا أساعد في مشروع مبتدئ صغير فوراً ومن غير مقابل، لأن فيه ناس كتير بتفتكر طبعا ان احنا بناخد فلوس او هدايا لا الموضوع مش زي ما الناس متخيلة انا بحب جدا أساعد أي براند مصري لسه بادي بان انا افرج حلاوة الحاجة، مببقاش مركزة أنا بقول إيه.. عمري في حياتي ما رتبت كلامي، وبارتاح أكتر لفكة المصداقية إني عاوزة الناس تشوف الحاجة وجمالها معايا وأشاركهم ده.. مش أكتر ولا أقل، ورد فعهلم في الآخر بتاعهم ممكن الناس عجبتهم الحاجة هيروحوا يعملوا فولو، أو ما يعملوش ده.. أنا مابحبش أضغط على الناس إنهم يروحوا يعملوا فولوا للناس دي غصب عنهم كل واحد براحته وبمزاجه.

أما الفولورز عندي فهما أذكياء جدا ومش أي حاجة والسلام يعملوا لها فولو، لما باجي بحط أي منتج عندي جديد بقولهم جالي هدية من كذا.. دول بيعملوا كذا كذا اتفرجوا على الحاجات اللي بعتينها دي حلوة دي هتنفعنا في كذا كذا، الناس ال عندي أذكياء بقى مش عشان أنا بس قولت حاجة كدا فهيروحوا يعملوا فولو وخلاص لا هما فعلا لو محتاجين الحاجة دي وشايفين الحاجة حلوة هيعملوا فولو، ولو المنتج عاجبني بزيادة وحاسة فعلا إنه هيفيد الناس لا ممكن تلاقيني بقولهم بصوا على البرودكت ده، وأقول فوايده واستخدامه بشكل واضح، وده في حد ذاته جزء من المصداقية.

هل سرق عبدالرحيم كمال قصة مسلسل نجيب زركش من مسرحية بريخت؟ رؤية مختلفة عن بونتيلا وماتي ونجيب وطريف

محمد صلاح يثير الجدل من جديد على السوشيال ميديا بتغريدته عن أحداث فلسطين

5- السوشيال ميديا خلقت مجتمع جديد له عيوبه الكبيرة ومميزاته الواضحة.. إيه مميزات وعيوب مجتمع السوشيال ميديا من وجهة نظرك؟

شخصياً، ساعات كتير جدا بحس إني عايزة أقفل الأكونت بتاعي على إنستجرام، لأن في حاجات كتيرة ممكن بتضايقني مش من الأكونت بتاعي، لكن عمري ما بمشي وأقول كفاية اللي انتم بتعملوه لأن كل واحد براحته يعمل اللي هو عايزه، ويمكن عشان كده بدأت أعمل ميوت لحاجات أنا مش عايزة أشوفها عشان متضايقنيش ..

السوشيال ميديا كمان مشكلتها ان الناس عايزة تقلد بعض، ومافيش استعداد كبير إنك تراهن على اللي يخصك وعلى قدراتك ومواهبك، الكل عاوز يقلد من غير ما يفكر، عايزة تكبر وتتشهر باستغلال الآخرين..

المشكلة إنك لما تلاقي إنك تعبتي في حاجة جامد بطريقة معينة، وييجي حد بمنتهى البساطة ياخد الحاجة دي كوبي اند بست، وكأن شيئاً لم يكن، وكأن ده حقه الطبيعي..

أما مميزات السوشيال ميديا أن فيها  اكونتس بتفرح الناس بتخلي الناس فرحانة وسعيدة، في اكونتس تانية بتكئب الناس على قد ما انتي شايفة أن الشخصية دي مفرحة وجميلة وحلوة لكن انتي في الاخر ممكن تقعدي تقولي بصي بتعمل ايه وبتروح فين وعيالها عاملين ايه وبيشتغلوا فين وبيقعدوا اكيد بتكسب قد إيه، الموضوع مش صح، يعني في ناس بتبين حاجة لكن هي من جواها حاجة تانية خالص لأن مش كل الناس عايزة تبين الوحش والحلو، في ناس بقى بتستفز الناس بزيادة يعني بصوا انا عندي ايه، دا كله بيدل على انه قد ايه بييجي على نفسية الفولورز اللي بيتفرجوا عليه بيكتئبوا وبيبدأوا كومبارينج لحياتهم، الموضوع وحش قوي فلازم بنكبر دماغنا.

6- لو طلب منك حد بيشق طريقه إنه يكون فود بلوجر إيه أهم النصايح اللي بتشوفيها أساسية للنجاح؟

السؤال ده بيتكرر عندي كتير، ودايما إجابتي واحدة: خليك مختلف، ممكن يبقى عندك مثلك الأعلى، لكن النجاح بقى إنك تخليك مختلف عنه، وماتعملش الحاجات كوبي اند بست، لأنك كده بتسرق مجهوده اللي هو شغال عليه سنين (خبرات/ تجارب/ أفكار….) وفي الاخر حد صغير ييجي يبدأ ياخد نفس الحاجات ونفس طريقة التصوير ونفس طريقة الميوزيك ونفس طريقة الطبخ ونفس طريقة الكلام وكل الوصفات بتتقال هي هي، دي حاجة ماأحبهاش أبداً لأي حد..

وخليك متأكد إن الناس هتحبك بطريقتك لكن لما تقلد حد الناس هتيجي لك ليه، وهما بالفعل عارفين النسخة الأصلية ومتابعينها؟ فالحل إنك لازم تكون مختلف وكرييتف، بطريقتك مش بطريقة حد تاني..

وعلى المستوى الشخصي من أول ما بدأت الأكونت بتاعي وانا أي حاجة باخدها رسيبي من حد، طريقة معينة.. تكنيك معين.. لازم أشكره في ستوري بتاعتي أو الفيديو بتاعي أو أي حاجة وأعمل منشن ليه، يعني على سبيل المثال اتعلمت سلق الرز البسمتي من سارة خانا، لازم أقول أني اتعلمت الرز البسمتي من سارة خانا، وهكذا… الطبيعي إن الواحد بيفضل يتعلم.. دا جوردن رمزي بيتعلم.. الشيف جيمي اوليفر.. كل الشيفات الكبار لغاية دلوقتي بيتعلموا والموضوع كبير جدا الطبخ دا حاجة كبيرة جداً.

يوسف زيدان يثير الجدل عل فيسبوك بمنشور عن أحقية الجميع في القدس .. وجمهور السوشيال ميديا: بوست لئيم

خبر وفاة النجم سمير غانم بسبب كورونا يسيطر على السوشيال ميديا ويتصدر جوجل ترند خلال ساعة فقط .. وحالة زوجته الفنانة دلال عبد العزيز تثير القلق

7- معرض القاهرة الدولي للكتاب على الأبواب، واحنا في موقع آخر مترو بنهتم بالكتب.. إيه هي أهم ميول سارة نشأت في القراءة؟

سارة نشأت مبتحبش تقرا، يعني أنا مش الشخصية ال تحب تاخد كتاب وتقعد تقراه، الحاجة الوحيدة اللي بحب أقراها هي كتب الطبخ، بس بردو مش هي الشخصية النيرد بقى ولابسة النضارة وتقعد تقرا بقى خالص..

أنا بحب أتفرج على الحاجات أكتر من إني أنا أقرا للاسف دي حاجة مضايقاني بس أنا متعلمتش دا من صغري ان انا امسك كتاب واقعد اقراه عشان حياتي كلها كانت في الرياضة، ان انا بلعب رياضة أكتر من ان انا اقرا فبصراحة مش عارفة أرد على السؤال دا خالص، معرض الكتاب لو روحته هجيب من عنده كتب طبخ فقط فانا بطلب من أي حد انه يحب القراية ويعلم ولاده من صغرهم ان هما يقروا لأن الموضوع دا مدايقني جداً.

8-  جروب الماميز النهارده بقت مشهورة أكتر من الأمم المتحدة.. إيه هي أبرز المواقف الطريفة اللي بتشوفيها كأم في الجروبس الخاصة بتعليم ولادنا؟

بصراحة الجروبس بتاعت الماميز اللي أنا فيها هادية جدا ههههههههههه، يمكن الحاجة الوحيدة اللي ممكن نقعد نفكر فيها كتير هي هدية عيد الأم للتيتشرز، أو عيد ميلادها أو غيرها من المناسبات، أو أي حاجة، لكن غير كدا الحمدلله مبتحطتش في موقف مش لطيف، مش عايزة أحسد نفسي عشان مدخلش في جروب السنة اللي جاية مع أمهات غراب ربنا يستر، أنا بحب أدخل دايما أهزر مش الشخصية الجد خالص في الجروبس بتاعت الماميز عارفة دايما جروب المامي تلاقي ال هي على طول بتلم الفلوس عشان الهدية، أنا بقى اللي جاية أهزر جاية أهزر وأمشي بس .

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى