إيمان الشرقاوي تروي سبب بكاء إحدى قارئاتها.. ولماذا اختارت الملكية

من يتابع نشاط حساب الكاتبة والمدونة إيمان الشرقاوي سيلتقط دون عناء خيط تمتعها بخفة ظل كبيرة، رغم كونها مؤسسة وأدمن صفحة Royal story المعنية بالتأريخ بالصور والفيديوهات لفترة مصر الملكية إلا أن كتابتها بروح مصرية للغاية، ولأنها أيضاً من كتاب منصة كتبنا التي عنيت آخر مترو بتقديم تقرير عنها من خلال مقابلة مع مؤسسها الكاتب محمد جمال مؤخراً في قسم كتب وكتابات..

“إيمان عباس الشرقاوى؛ مواليد برج الدلو لعام ١٩٨٨؛ ماجستير في تربية الأطفال؛ تهوى الكتابه وبخاصة التاريخيه منها” تركيبة مغرية بالتعرف عليها عن قرب، لذا كان لآخر مترو معها هذا الحوار..

بدايات إيمان الشرقاوي

سألناها: هل تركتي مجال تخرجك وامتهنتي الكتابة ام الكتابة مجرد موهبة؟

أجابت: والدى الله يرحمه كان شاعر وأصدر ديوانين شعر فى حياته هما ( رسالتى إليك ؛ مشاعري ليست خطيه ) ؛ يمكن تكون الكتابه موهبه بالوراثة ؛ وانا اتربيت على وجود مكتبه فى البيت و القراءه كان لها حيز كبير في حياتى من اول ما بدأت القراءه ؛ بدأت بمجلات ميكى وبطوط و فلاش و اصدارات د نبيل فاروق و د أحمد خالد توفيق ومجلات علاء الدين و الشباب ونصف الدنيا وكلمتنا ؛ ده غير طبعا مهرجان القراءه للجميع فى كل اجازه صيف ؛ ثم انتقلت إلى مرحلة الروايات و الكتب..

إذا كنت تكتب الرواية أو الشعر أو القصة أو أدب الطفل أو المسرح أو النقد.. هذه فرصتك للتقدم لجائزة الشارقة للإبداع العربي والفوز ب6 آلاف دولار عن كتابك

وامتى اكتشفتي موهبة الكتابة؟

عندما كنت فى الصف الثالث الاعدادي ؛ كتبت اول خواطر فى حياتى..

مؤلفات إيمان الشرقاوي

-وماهي مؤلفاتك؟كم عددهم؟

أجابت: قمت بتأليف عددا من الكتب والروايات ؛ وصدر منها حاليا رواية “بيت العز” .

وبسؤالها:
-حدثينا عن كل مؤلف منهم؟وكان صادر عن دار نشر ايه؟

أجابت: رواية بيت العز هى أول روايه منشوره لى ؛ وهى عن دار كتبنا للنشر ؛ وهى رواية أجيال تتحدث عن مصر فى ١٠٠ عام من خلال أسرة مصريه بسيطه و أجيالها ؛ و استعرض بها اهم الاحداث السياسيه و الفنيه والتغييرات التى مرت على البلاد من خلال المواطن البسيط .

غلاف رواية بيت العز
  • وبناء على إيه اخترت أسماء مؤلفاتك؟

أجابت: بناءا على فكره الروايه ككل ؛ بحيث يكون معبرا عن أحداثها وفى نفس الوقت جذاب للقارئ .

  • وايه الصعوبات اللي واجهتك في الكتابة؟

كنت أكتب مقالات تاريخيه فى مجلة البوسطجى وفى صفحة Royal Story لمدة تزيد عن عشر سنوات ؛ الصعوبة الأكبر بالنسبه لى فى التحول من كتابة المقال التاريخى إلى الروايه .

  • ولماذا اخترت منصة كتبنا لنشر رواية بيت العز رغم كونها منصة جديدة؟

رشحتها لى أحدى صديقاتى ؛ وتجربتى مع دار كتبنا هى الخطوة الأولى في مشوار النشر الأدبي والتى أتمنى أن يليها عدة خطوات أكثر .

  • من قد إيه بتكتبي؟ ومين شجعك على الكتابة في بداية الامر؟

بكتب تقريبا من الصف الثالث الاعدادي؛ وأول شخص شجعنى كان أستاذ اللغه العربيه أ-وائل عيسي .

  • وإيه افضل ردود الفعل على كتاباتك؟

أجابت: من اجمل ردود الفعل على روايتى لما فى قراء قالولى أن الروايه أثرت فيهم وأعادوا قراءة صفحات بعينها و أن دموعهم اتحركت مع المواقف المؤثره في الروايه. وفى قارئه قالت لى أنها بكت بشده مع صفحات الروايه ويوميات الأسرة وخاصة أن والدتها متوفيه وأنها عاشت جو الأسره بين سطور الروايه.

صفحة Royal Story

وبسؤالها:
-عرفنا أن عندك صفحة على موقع فيسبوك كتجربة ناجحة جدا على السوشيال ميديا اسمها Royal Story كلمينا عنها بإستفاضة؟

أجابت: أنشأت صفحة Rotal Story فى ٢٠٠٩ ؛ وهى صفحه مهتمه بالتاريخ الملكى حول العالم ؛ و إنضم إلى فريق الصفحه على الترتيب : محمد ممدوح فايق ؛ عمر أحمد ؛ ساره ؛ إسلام صالحين ؛ غاده
والحقيقه أنا يمكن اشتغلت لوحدى لمدة سنه واحده بس فى الصفحه ؛ لكن لمدة ١٠ سنين من عمر الصفحه كان باقي الفريق هو اللى قام بالدور الأكبر فى نجاح الصفحه و استفدت أنا شخصيا منهم كتير جدا؛ والحمد لله حاليا يتابع الصفحه حاليا حوالى ربع مليون متابع وتم اعتماد الصفحه كمصدر موثوق فيه للمعلومات من جوجل و موقع ويكيبديا .كما أصبحت مصدرا للعديد من الكتب التاريخيه مؤخرا .

صورة من الصفحة التي تديرها الكاتبة إيمان الشرقاوي
  • ومنين جاتلك فكرة انشاء الصفحة؟

سمعت حوار جميل اوى للملكه فريده مع الاذاعيه امال فهمى فى برنامج على الناصيه ؛ وكانت الملكه فريده بتتكلم بطريقه راقيه و جميله جدااا ؛ لما سمعتها قلت مش معقول تكون بتتكلم عربي بالشكل الجميل ده واحنا طول حياتنا متصورين أن أفراد اسرة محمد على بيتكلموا بطريقة (حظرتنا) و (حاظر أفنزم)؛ فبدأت أبحث من وقتها و أقرأ فى التاريخ واكتشفت معلومات كتير مكنتش اعرفها عن تاريخ الأسرة العلوية وأنهم كانوا بيهتموا بالثقافة و الفن والأدب وهناك أفراد كتير من الأسره كان ليهم مؤلفات والعديد من الكتب والتراجم .
سر حبي للملكيه هو الرقي اللى كان السمه الاساسيه في الفترة دى فى كل مظاهر الحياة..

  • وبتعتمدي على مصادرك للصفحة ومعلوماتها منين؟

بنعتمد اولا على الشخصيات الملكيه من الاسره أو على الكتب والمواقع الموثوق فى معلوماتها ؛ لان فى معلومات كتير فى التاريخ متناقضه وخاطئه ١٠٠ ٪ ؛ مثلا ذكر فى أحد الكتب أن الملك فاروق كان قد طلب من الشيخ المراغى فتوى تمنع الملكه فريده من الزواج بعد الطلاق ؛ ومن يدقق بالأمر يجد أن الشيخ المراغى قد توفي قبل طلاق الملك فاروق و الملكه فريده ب ٣ سنوات كامله .

-وامتى حسيتي ان مشروع الصفحة بينجح على السوشيال ميديا وليه صدى واداكي الدافع انك تكملي؟

فيه موقف جميل اوى حصل مع اخويا فى شغله فى الصعيد ؛ التقي بأحد زملائه و كان بيتكلم مع اخويا عن التاريخ وعن اجمل الصفحات اللى بتتكلم عن التاريخ على الفيس بوك وقاله أن اشطر صفحه على الفيس واللى بيتابعها يوميا هى صفحه اسمها : Royal Story..

  • ‏أخويا أجاب : اه دى صفحة أختى 😁
    زميله مكنش مصدق غير لما اخويا فتح الفيس و خلاه يشوف الاكونت بتاعى و يتأكد بنفسه .

دى كانت من المواقف الجميله اوى اوى واللى حسيت فيها أن فى ناس بتستنى تشوف احنا بنكتب ايه يوميا ؛ وأكتر حاجه بتفرحنى لما أفراد من الأسرة المالكة بتبعت على الصفحه رسائل شكر وتقدير على مجهودنا و بتشارك معانا صور نادرة و معلومات جديدة.

إيمان الشرقاوي
  • وإيه مشاريعك القادمة في الكتابة؟

-حاليا انتهيت من كتابة رواية جديده عن العلاقه بين الأم و طفلتها ؛ كما أننى أجهز حاليا لكتاب مجمع لأهم مقالات صفحة Royal Story .

مقابلة إيمان الشرقاوي والكاتب أحمد مراد

-كلمينا عن مقابلتك بالكاتب الكبير أحمد مراد هل كان لقاء مطول أم مجرد صدفة؟وايه انطباعك عنه؟.

فعلا التقيت بالأستاذ أحمد مراد فى طنطا فى حفلة توقيع رواية لوكاندة بيت الوطاويط؛ وهو شخصيه جميله جدا و بيتعامل بإحترام وذوق وتواضع شديد دون تكبر ؛ و دعمنى فى رواية بيت العز و أهديته نسخه منها .
أنا قابلت برضه أ نورا ناجى فى طنطا ؛ وهى شخصيه فى منتهى الجمال و قالتلى رأيها في رواية بيت العز ؛ ونصحتنى بنصائح غاليه جدا عشان الاصدارات القادمة، هى انسانه رائعه وفى منتهى الذوق..

تعرف الآن على أشهر مؤلفات كاتب الرعب حسن الجندي وآخرها رواية “صلاة الممسوس”

  • وهل ممكن تفكري تتحدثي عن ملوك الفراعنة واسرهم وصورهم في صفحة جديدة او تضيفيهم لصفحتك ولا صعب؟

بالفعل فى ألبوم فى صفحة Royal Story بعنوان Egyptology و نتحدث فيه عن مصر القديمه.

  • كلمينا عن مجلة البوسطجي وتجربتك معاها في الكتابة؟

مجلة البوسطجى من المحطات الجميله جدا فى حياتى و فخورة إني من فريقها؛ وكل أعضاء الفريق على درجة عالية من الثقافة والاحترام وعلى رأسهم الكاتب محمد الزمزمى مدير التحرير.
بكتب فيها من ٢٠١٤؛ وتوقفنا عن الإصدار لفتره وإن شاء الله راجعين تانى.

-وإيه هي مصادر إلهامك؟ وبتتأثري بمين من الكتاب؟

مصادر الالهام بالنسبه لى هما الناس و نبض الشارع والحياة والأحداث اللى حوالينا وأهم ملهمة بالنسبة لي هى بنتى مريم؛ من كتابنا المعروفين بحب أوى نجيب محفوظ ونورا ناجى وأشرف العشماوي وعمر طاهر وأحمد مراد وملهمتى فى النجاح هى j.k Rowling مؤلفة سلسلة هاري بوتر.

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى